CEAS Pauli Majori

Unu brìndisi chi arregordat is cosas prus de importu de sa vida: sa saludi e su trigu, una loba de fueddus chi non si podit partziri po sa cultura de is massajus de is biddas de s’Unioni de is Comunus: Santa Justa, Prammas, Sabarussa, Siamaiore e Biddobrana. Una loba de fueddus chi ndi fait bessiri a pillu abisòngius simpris, sintzillus, capatzus de assegurai siat amparu siat assèliu.

Oindii su trigu dd’arant e dd’impreant po fai su pani in domu, comenti acontessit in Biddobrana. Su pani est unu de is sinnus de custus logus chi s’incarant faci a sa baddi de su Tirsu e a su Golfu de Aristanis, una de is cussòrgias prus bundantziosas e de bonucoru de sa Sardìnnia. Su connotu de is mandiaris e de su binu amostat ancoras custas arraxinis antigas, piessinniendi e scerendi sa cultura alimentari de su territòriu.

Fogimenta, lori, bìngias, olivàrius, matedus de fruta pintant su paesàgiu e s’intendint me in is arretzetas de is mannus: simpris e sintzillas, aici etotu comenti a is ingredientis chi ponint po ddas aprontai.

Mandiaris e binu funt espressadas de una manera di bivi, e non sceti is donus de sa cultura de is massajus. Si càrrigant de calincuna cosa sacra, innui sa cultura antiga si biit in dònnia mòvida e in dònnia prodùsiu.

S’arrespetu de is logus, su de allogai su connotu, sa vida chi est piessinniada de s’echilìbriu intra de cosas de s’òmini e cosas naturalis ndi bessint a pillu in sa manera de allogai e avalorai is stàinis, is terras, is bìngias e is olivàrius.

Su mari s’unit a is stàinis, intreverendi stòria e produsimentus. Is stàinis a manera particolari allogant ancoras un’abundàntzia e una biatzesa de su pisci ùnica, scoviendi a is ogus, a su coru e a sa buca de s’abisitadori atentu su spantu antigu de una stòria millenària.

Su connotu in su faimentu de is durcis est arricu meda, cun is durcis de mèndula chi ddus acumpàngiat beni sa Carnàcia, binu apretziadu chi rapresentat totu su territòriu.