CEAS Pauli Majori

Biddobrana, chi s’agatat in sa baddi intra de su Monti Arci e su Grìghini, tenit orìginis romanas e su nòmini suu arribat de Villa Urbis chi dd’arregordat che a una bidda de sa tzitadi, est a nai de sa tzitadi romana de Othoca. In su sartu suu, però, ddoi at arrastus mannus de sa presèntzia de s’òmini giai de s’edadi nuraxesa: difatis si contant unus 40 nuraxis, intra de custus Bau mèndula, Bidella, Craddaxus, Is porcilis e Turriu, fràigus chi s’allogant bastanti beni, e unas cantas tumbas de gigantis in mesu de su paesàgiu spantosu de su Monti Arci.

In mesu de sa bidda, fraigada in edadi medioevali e formada de domus a sa manera campidanesa a innui si ddoi intrat passendi peri portalis antigus chi piessìnniant su tzentru stòricu, ddoi est sa crèsia de Santa Margherita, de stili barocu.

De importu est sa cultura de su binu e cussa de s’ollu, ma pruschetotu cussa de su pani. A su faimentu de su pani est acapiada sa sèmina de su trigu de innui s’otenit sa farra po su pani fatu in domu, cosa chi at fatu a manera chi Biddobrana siat nodida po custu, intrendi finsas in su circu natzionali de is tzitadis de su pani.

Is massajas biddobranesas faint pani pesau (partzidas e tureddus) e pani apungiau (moddixinas e ladas), cun formas pintadas po su pani de festa. A custa faina de su connotu ddi dèdicant sa Sagra de su pani fatu in domu, chi si fait faci a s’acabu de su mesi de ladàmini. In custa ocasioni fait a abisitai sa domu antiga chi acasàgiat su Museu de su pani. Po sa sagra si cuncordat finsas un’amosta de artisanadu bellu de sa bidda, cun su strexu fatu de pèrtia, canna sperrada e giuncu intèssius apari.