Su territoriu
Formada de is Comunus de Prammas, Santa Justa, Siamaiore, Sabarussa e Biddobrana, su territòriu de s’Unioni unit apari su monti e su mari de su Golfu de Aristanis.
Sunt biddixeddas piticas e praxilis, chi allogant sa manera antiga de fraigai e de bivi is logus e su tempus de is bividoris antigus de custas terras.
De is costeras de mari a is costeras de su vulcanu bèciu, passendi peri stàinis e campuras bundantziosas chi ingìriant is montrigus de Monti Arci e de Monti Grìghini, innui s’agatant nuraxis castiadoris de bestiàmini e de pasturas in s’edadi de su Brunzu, torrendi cara a portus marinus bècius, innui s’abbiatzànt is mercaus de is bendiolus antigus fenìtzius.
De su colori grogu de sa palla de is mesis de s’istadiali a su birdi prenu de su beranu, sa muda de is stasonis e de is coloris acumpàngiat sa scoberta de custu tretu de Sardìnnia, logu de avesus antigus, traditzionis e valoris culturalis e materialis chi oindii bivint ancoras in su DNA de sa genti de custas biddas.
Su territòriu de s’Unioni de is Fenìtzius est in su naturali fungudu cosa sua ospitali, lentu, sintzillu e familiari, atesu e diferenti de is ritmus de is logus turìsticus prus connotus.
Logu spantosu po is apassionaus de turismu emotzionali, oferit una filera de esperièntzias spiritualis e materialis, innui su colori si cojat cun su sabori, innui su càntidu fait scerai de prus su mudori e innui su tempus de s’antigòriu e su tempus presenti benint apari in d-un’amesturu spantosu.
In custus logus su biaxi no est prus vacàntzia sceti e dònnia cussòrgia e dònnia bidda funt logus de atòbiu innui su bisistadori at a podi scoberri su sentidu de acasàgiu chi piessìnniat sa genti de custa terra, fèminas o òminis chi de milli e milli annus allogant s’avesu a su bonocoru e a s’acasàgiu po genti de dònnia terra e de dònnia arratza, virtudi - custa – chi fait scerai is diferèntzias e favoressit sa cumpartzidura.
Sa curiosidadi at a essi su sentimentu maistu e is emotzionis ùnicas ant a essi is donus chi dònnia òspiti de su territòriu si nci at pigai avatu.
Galleria
